गत साता सेयर बजारमा तीव्र उतारचढाव, ६ अर्ब ६ करोडको सेयर कारोबार

विगतका साताहरूभन्दा यो साता सेयर बजारमा तीव्र उतारचढाव देखिएको छ । अघिल्ला साताहरूमा निरन्तर रूपमा बढ्ने क्रममा रहेको नेप्से गत साता सबै दिन कारोबार घटेको थियो । तर, यो साता तीव्र उतारचढावका बीच पनि नेप्सेमा मिश्रित प्रभाव देखिएको छ ।

आइतबार, मंगलबार र बुधबार बढेको बजार सोमबार र बिहीबार घटेको छ । नेप्सेमा भएको घटबढले मात्र नभएर लगानीकर्ता, धितोपत्र ब्रोकर र नेपाल धितोपत्र बोर्डको गतिविधिका कारणले पनि बजारमा तीव्र उतारचढाव आएको हो ।

गत आइतबार सामान्य अंकले घटेको नेप्से सोमबार ८८ दशमलव ८१ अंकले घट्यो । कारोबार अवधिको मध्याह्नतिर बजार ५ प्रतिशतले घटेपछि सर्किट ब्रेकर मार्फत उक्त दिनको करोबार बन्द गरिएको थियो । यही बहानामा लगानीकर्ताहरूले नेप्से, बोर्ड र अर्थ मन्त्रालयमा पुगेर बजारको घटदो क्रम रोक्न हारगुहार गरे । उनीहरूकै मागबमोजिम बोर्डले कालो धन अध्ययन गर्न गठित समिति खारेज गर्‍यो । 

यसलाई लगानीकर्ताले ठूलै उपलब्धिका रूपमा लिए । परिणाम मंगलबार बजार करिब साढे ८४ अंकले बढ्यो । उक्त दिन तीन पटक सर्किट ब्रेकर लागेकाले करिब २७ मिनेट मात्र सेयर कारोबार भएको थियो । त्यस दिन नेप्से ५ प्रतिशतभन्दा धेरैले बढेपछि बजार बन्द गरिएको थियो । उक्त दिन केही ब्रोकर कम्पनीले ‘मिलोमतो’ कारोबार गरी बजार बढाउन लागिपरेको अनुमान छ । नेप्सेले बुधबार केही ब्रोकर कम्पनीलाई ‘मिलोमतो’ कारोबार बारे स्पष्टीकरण सोधेको थियो ।  

साप्ताहिक कारोबारमा सेयर बजारमा जलविद्युत्, वित्त कम्पनी र ‘अन्य’ बाहेक सबै परिसूचक सकारात्मक रहे । यो साता सेयर बजारमा दैनिक औसत ९३ करोड रुपैयाँ बराबरको सेयर कारोबार भएको छ । अघिल्लो साता दैनिक औसत १ अर्ब १ करोड रुपैयाँ बराबरको सेयर कारोबार भएको थियो । साताभर नेप्सेमा ६ अर्ब ६ करोड रुपैयाँ बराबरको सेयर कारोबार भएको छ । अघिल्लो साता ७ अर्ब ८१ करोड रुपैयाँ बराबरको सेयर कारोबार भएको थियो । 

Source :   kantipur.ekantipur.com/